Министерот за односи меѓу заедниците, Агон Ферати, денеска се сретна со амбасадорот на Република Турција во Скопје, Фатих Улусој, при што разговараа за унапредување на билатералната соработка и за прашања од заеднички интерес.
На средбата беше потврдена подготвеноста за натамошно зајакнување на пријателските односи и институционалната соработка, со посебен акцент на образованието, воспитно-образовниот процес и правичната застапеност на турската заедница во земјата.
Ферати ја истакнал важноста од еднаков третман на сите етнички заедници и обезбедување еднакви можности во сите сфери на општествениот живот, вклучително и во развојот на инфраструктурата.
Соговорниците разговарале и за продлабочување на соработката со турските институции и невладините организации кои дејствуваат во земјава, меѓу кои ТИКА и МАТУСИТЕБ, со цел реализација на проекти во интерес на граѓаните.
На крајот од средбата, Ферати и Улусој ја изразиле својата подготвеност за понатамошно унапредување на партнерството меѓу Македонија и Турција.
