Лекарот не му дозволи на Фицо да лета до Белград, тој сепак испрати порака до Вучиќ

Словачкиот премиер Роберт Фицо нема да допатува во Белград на предизборниот митинг на листата „Александар Вучиќ – Обединета Србија“, откако неговиот личен лекар не му дозволил да патува со авион. Информацијата ја објави Српската напредна партија, а Фицо претходно соопшти дека цела недела се бори со вирусна инфекција.

Во соопштението се наведува дека здравствената состојба на Фицо и последиците од обидот за атентат врз него не му дозволуваат да патува со авион. Тој, сепак, сакал лично да присуствува на собирот во Белградската арена.

— реклама —

Фицо побарал неговиот претходно подготвен говор да биде прочитан на митингот, со кој сака да им упати поздрав на Вучиќ и на граѓаните на Србија.

— реклама —

Во пораката Фицо го опишува Вучиќ како свој пријател и изразува поддршка за Србија. Тој во говорот наведува дека ја поддржува Србија поради, како што вели, нејзината суверена политика и дека смета оти земјата има право сама да носи одлуки.

Фицо воедно ја нагласува поддршката на Словачка за територијалниот интегритет на Србија и наведува дека неговата земја нема да го промени својот став за Косово.

— реклама —

Во говорот тој се осврнува и на односите меѓу Словачка и Србија, како и на словачката заедница во Србија.

— реклама —

На крајот од пораката Фицо му порачува на Вучиќ и на неговите поддржувачи да продолжат по патот што го застапуваат, завршувајќи со зборовите: „До победа, Александре“. Целиот говор е најавено дека ќе биде прочитан на собирот.

Митингот на листата „Александар Вучиќ – Обединета Србија“ се одржува денеска во Белградската арена. Вучиќ претходно го најави Фицо како специјален гостин на собирот.