Лидерот на СДСМ, Венко Филипче, од Крушево по повод Илинден порача дека денес се оддава почит на хероите на Илинденското востание и Крушевската Република, но и дека нивната борба треба да биде потсетник за иднината на државата.
„Денес во Крушево оддаваме почит на хероите на Илинден и на Крушевската Република – на оние кои пред повеќе од еден век се бореа за слободна и достоинствена Македонија. Нивната жртва не беше за изолација. Не беше за страв. Не беше за поделби“, напиша Филипче.
Тој оцени дека илинденците се бореле за слобода, правда и правото народот сам да ја одлучува својата судбина, додавајќи дека денес постои обврска да се продолжи по истиот пат.
„Македонија не смее да остане заробена во минатото. Не смее да биде држава во која младите заминуваат, во која пензионерите едвај преживуваат, во која водата за пиење е опасна, а институциите служат на тесен круг луѓе“, наведува лидерот на СДСМ.
Според него, сеќавањето на Илинден има вистинска вредност само ако служи за градење подобра иднина.
„Затоа ние се бориме за Македонија во која владее правото, а не партискиот интерес. За Македонија во која има чиста вода, достоинствени плати и перспектива за младите. За Македонија која е дел од европското семејство – слободна, демократска и просперитетна“, истакна Филипче.
Тој порача дека борбата денес е насочена против корупцијата, изолацијата и, како што наведе, „лажниот патриотизам што ја држи државата во место“.
„Илинденците се бореа против тиранијата на своето време. Денес нашата борба е против корупцијата, против изолацијата и против лажниот патриотизам што ја држи државата во место. Ние се сеќаваме на минатото. Но ја избираме иднината. За многу години Илинден! Да живее Македонија“, порача Филипче.
