Во недела посебен сообраќаен режим во Илинден поради атлетска трка

Во недела, 27 септември, во општина Илинден ќе се одржи улична атлетска трка поради која ќе биде воведен посебен режим на сообраќај. Настанот е најавен со почеток во 08:00 часот, во организација на Атлетскиот клуб „Скопски Маратон“.

— реклама —

Трката ќе започне од улицата „9“, пред Домот на културата во Илинден, по што учесниците ќе продолжат по улиците „534“ во населба Илинден, „532“ во село Марино и „10“ во село Кадино.

— реклама —

На кружниот тек во Кадино трасата ќе продолжи со полукружно враќање по истите улици, односно по улиците „10“, „532“, „534“ и „9“. Потоа учесниците ќе продолжат по улицата „2“ до Домот за стари лица, каде повторно ќе има полукружно враќање по улицата „2“ до целта пред Домот на културата на улицата „9“.

— реклама —

Од МВР информираат дека Единицата за безбедност на патниот сообраќај ќе преземе мерки за посебен режим, при што возилата ќе се пренасочуваат по околните сообраќајници.

Од Министерството апелираат до граѓаните и возачите да ги почитуваат насоките и наредбите на полициските службеници на сообраќајниците каде што ќе се одвива атлетската трка.