Венко Филипче однапред испраќа сигнали дека е подготвен за нови национални отстапки само за да дојде до власт, обвинуваат од ВМРО-ДПМНЕ преку соопштение. Од партијата оценуваат дека лидерот на СДСМ не ги брани државните позиции, туку ја подготвува јавноста за прифаќање на бугарските барања.
Според ВМРО-ДПМНЕ, во период кога официјална Бугарија, како што наведуваат, секојдневно испраќа пораки со кои се оспоруваат македонскиот идентитет, јазик и историска посебност, Филипче не покажува загриженост и не бара цврсти гаранции за заштита на националните интереси.
Од партијата тврдат дека СДС и Филипче водат политика на капитулација пред бугарските барања, потсетувајќи на, како што велат, политиките на поранешниот премиер Зоран Заев.
„Тоа е истата стара матрица на однесување на СДС. Зоран Заев прво тврдеше дека нема опасност за националните интереси, а потоа следуваа низа отстапки кои оставија длабоки последици и разочарување кај народот“, наведуваат од ВМРО-ДПМНЕ.
Од владејачката партија оценуваат дека Филипче не нуди визија и стратегија за заштита на државните интереси, туку политика на попуштање и прифаќање на, како што велат, туѓи диктати со цел да обезбеди политичка поддршка.
ВМРО-ДПМНЕ повторува дека македонскиот идентитет, јазик, историја и култура не смеат да бидат предмет на уцени, преговори и политичка трговија и оти никоја власт нема мандат да преговара за темелните вредности на македонската државност.
