Дигиталната трансформација на правосудниот систем беше во фокусот на средбата што министерот за правда Игор Филков ја оствари со претставници на Обединетите нации и Канцеларијата на Обединетите нации за проектни услуги (UNOPS).
На средбата присуствуваа постојаната координаторка на Обединетите нации во Македонија, Рита Колумбија, регионалната директорка на UNOPS, Микела Талин, претставничката на Канцеларијата на Високиот комесар на ОН за човекови права, Тања Темелкоска, како и Марко Вујачиќ, раководител на програмата на UNOPS за Југоисточна Европа.
Соговорниците разговарале за воспоставување стратешко партнерство насочено кон модернизација на правосудството, со цел создавање поефикасен, потранспарентен и подостапен судски систем.
Притоа биле договорени идни активности кои вклучуваат надградба на системот АКМИС, воведување електронска достава во судските постапки, унапредување на системите за аудио- и видеоснимање на судските рочишта, подобрување на поврзаноста меѓу институциите и зајакнување на сајбер-безбедноста во правосудниот сектор.
Од Министерството за правда посочуваат дека искуствата на UNOPS во спроведување слични проекти во земјите од регионот претставуваат значајна поддршка за домашните реформски процеси.
Министерот Филков нагласил дека Министерството останува посветено на изградба на современ правосуден систем кој ќе одговори на потребите на граѓаните и ќе биде усогласен со европските и меѓународните стандарди, при што поддршката од Обединетите нации е од особено значење за успешна реализација на реформите.
