Филков: Европската комисија го потврди сработеното од ЗНАМ, за две години подготвивме 33 закони и поставивме темели за реформа на правосудството

Поранешниот министер за правда и функционер на ЗНАМ, Игор Филков, оценува дека извештајот на Европската комисија за 2026 година ги потврдува реформите што биле спроведени во Министерството за правда во изминатите две години. Тој посочува дека во тој период биле подготвени вкупно 33 закони, со кои биле поставени темелите за реформа на правосудниот систем.

— реклама —

Филков ги издвојува новите закони за Судскиот совет и Советот на јавните обвинители, за кои Европската комисија дала позитивна оценка, наведувајќи дека тие ги адресираат препораките на Венецијанската комисија и придонесуваат за поголема транспарентност и јасност при изборот и утврдувањето одговорност на судиите и обвинителите.

Како значаен чекор го посочува и новиот Закон за парничната постапка, со кој по повеќе од 20 години се обновува важна законска рамка за граѓанските судски постапки, со цел нивна модернизација и забрзување.

— реклама —

Според Филков, од подготвените 33 закони, пет се веќе донесени, два се во собраниска постапка, десет се во владина процедура, а останатите се објавени на ЕНЕР или се финализирани.

— реклама —

Тој посочува и на зголемување на реализацијата на активностите од Развојната секторска стратегија за реформа на правосудството 2024–2028, од 42,9 отсто во 2024 година на 56,9 отсто во 2025 година.

Сепак, Филков признава дека извештајот нотира и сериозни предизвици, меѓу кои борбата против корупцијата, недостигот од финансиски и човечки ресурси, независноста на правосудните институции и ефикасноста на судските постапки.

— реклама —

Тој нагласува дека за целосно спроведување на реформите е неопходно донесување на преостанатите закони и активна вклученост на сите надлежни институции.