Финска заврши со изградбата на 200 километри ограда на границата со Русија

Финска, членка на НАТО, ја заврши изградбата на 200 километри долга ограда долж границата со Русија, соопштија финските власти.

— реклама —

Изградбата започна во август 2024 година, на делови од финско-руската граница, која е долга повеќе од 1.300 километри. Деловите биле избрани според проценката на финската гранична стража, каде што оперативната потреба била најголема, а изградбата економски најисплатлива.

„Најважна задача на државата е да ја обезбеди безбедноста на своите граѓани“, изјави финската министерка за внатрешни работи Мари Рантанен.

— реклама —

Оградата е висока околу 4,5 метри и е опремена со систем за технички надзор.

— реклама —

Тензиите долж границата меѓу Финска и Русија значително се зголемија откако Русија во 2022 година ја започна инвазијата врз Украина.

Финска во декември 2023 година ги затвори копнените гранични премини со Русија, откако ја обвини Москва дека намерно насочува мигранти кон границата со цел да ја дестабилизира земјата. Русија ги отфрла овие обвинувања.

„Без ограда на границата не е можно ефикасно, веродостојно и безбедно да се справиме со злоупотребата на миграцијата“, изјави Марку Хасинен од финската гранична стража.