Израелскиот премиер Бенјамин Нетанјаху изјави дека сè уште е рано да се утврди кој стои зад нападот што се случи во авион на „Флајдубаи“ на летот од Дубаи кон Тел Авив.
Инцидентот се случил во авион со повеќе од 170 патници, од кои најголем дел биле Израелци. Според досегашните информации, еден од пилотите во пилотската кабина со нож го нападнал другиот пилот, во обид да ја преземе контролата врз авионот.
Додека авионот нагло губел височина, неколку патници успеале да влезат во пилотската кабина. Тие го совладале напаѓачот, по што авионот бил стабилизиран и принудно слетал во Саудиска Арабија.
Израелскиот амбасадор во Обединетите нации го опишал инцидентот како терористички напад, но не посочил кој би можел да стои зад него. Од „Флајдубаи“ соопштија дека ги прекинуваат сите летови кон Израел до завршување на истрагата и апелираа да нема шпекулации.
Нетанјаху во интервју за Fox News изјавил дека ќе биде утврдено кој го извршил нападот и дали имал соучесници, но предупредил дека во моментов не треба да се зборува за можна вмешаност на Иран. Осомничениот пилот го испрашуваат саудиските власти, а Нетанјаху очекува тој да биде предаден на Обединетите Арапски Емирати. Тој додал дека разговарал со претседателот на ОАЕ, кој се согласил Израел да биде вклучен во испрашувањето.
Неименувани израелски претставници за медиумите изјавиле дека напаѓачот е државјанин на Оман, но Оман и ОАЕ засега официјално не го потврдиле тоа. Израелското Министерство за надворешни работи до своите дипломати испратило информација дека станувало збор за „обид за терористички напад врз Израелците, Обединетите Арапски Емирати и Договорот од Абрахам“, со кој во 2020 година беа нормализирани односите меѓу Израел и ОАЕ.
По разговорот со Нетанјаху, американскиот претседател Доналд Трамп изјавил дека ситуацијата сè уште не е целосно разјаснета. Тој рекол дека според досегашните информации, копилотот можеби бил терорист или лице со сериозни психички проблеми кое го нападнало пилотот.
По инцидентот беа упатени пофалби до патниците и членовите на екипажот за нивната реакција. Израелскиот премиер објави снимка од разговор со патникот Јанив Хајун, водоинсталатер, кој раскажал дека патниците слушнале врескање и почувствувале промена на притисокот кога авионот почнал да губи височина.
Хајун опишал дека патниците влегле во пилотската кабина и го затекнале напаѓачот на командите. Тој рекол дека го фатил напаѓачот и го извлекол од кабината, додека други патници се бореле со него. Потоа ги презел командите и го повлекол управувачот, потсетувајќи се на начинот на кој тоа го видел на телевизија, по што управувањето го презеле членовите на екипажот.
Пилотот кој бил нападнат со нож е индискиот државјанин и капетан Смит Маччхар. Според информациите, тој успеал да повика помош и да ја отвори вратата од пилотската кабина, со што им овозможил на патниците да влезат и да го совладаат напаѓачот.
Индискиот премиер Нарендра Моди го нарече пилотот херој, истакнувајќи дека и покрај опасноста по неговиот живот и тешките повреди покажал храброст и решителност да ги заштити останатите патници.
Маччхар, кој е од Мумбај, се наоѓа на лекување во болница во саудискиот град Табук, каде што авионот принудно слетал.
