Протестното движење познато како „Фламинго револуција“ во Албанија ги прошири своите барања, па покрај противењето на спорниот туристички проект во близина на островот Сазан, демонстрантите сега бараат и политички и уставни промени во земјата.
Меѓу главните барања се оставка на премиерот Еди Рама, формирање техничка влада со едногодишен мандат и спроведување длабоки институционални реформи. Организаторите порачаа дека протестите ќе продолжат по мирен пат сè додека нивните услови не бидат исполнети.
Според нивниот предлог, по заминувањето на актуелната влада треба да биде формирана непартиска преодна влада која во рок од една година ќе подготви политички и институционални реформи.
Меѓу предложените уставни измени се ограничување на премиерската функција на најмногу два мандата, како и воведување механизми кои, според демонстрантите, ќе обезбедат поголема еднаквост на граѓаните пред законот. Предвидено е овие промени да бидат потврдени на референдум.
Демонстрантите бараат и поништување на повеќе законски измени, меѓу кои и законите поврзани со заштитените подрачја и културното наследство.
Протестите започнаа пред три недели, откако започна расчистувањето на теренот во заштитено подрачје спроти островот Сазан, каде што е планирана изградба на луксузен туристички комплекс поврзан со Џаред Кушнер, зетот на американскиот претседател Доналд Трамп.
Во меѓувреме, протестното движење прерасна во поширока граѓанска иницијатива која покрај еколошките прашања ги отвора и темите за ниските плати, високите животни трошоци и иселувањето на населението.
Поддршка за протестите пристигнува и од албанската дијаспора, која организира собири во САД, Велика Британија, Канада, Франција, Германија, Италија, Шведска и Австралија.
