Фон дер Лајен: Договоривме слободна трговија меѓу ЕУ и Филипините

Европската Унија и Филипините постигнаа политички договор за трговскиот договор, објави претседателката на Европската комисија, Урсула фон дер Лајен, по телефонскиот разговор со филипинскиот претседател Фердинанд Маркос Помладиот.

— реклама —

Објавата доаѓа три години по посетата на Филипините на фон дер Лајен, која требаше да создаде услови за продолжување на преговорите за трговски договор меѓу Брисел и Манила. Договорот претставува и чекор на Европската Унија кон проширување и диверзификација на економските врски, во услови на промените во глобалната трговија и засилениот кинески извоз.

„Тукушто договоривме договор за слободна трговија меѓу ЕУ и Филипините!“, објави фон дер Лајен од Њујорк, каде што учествува на Генералното собрание на Обединетите нации.

— реклама —

Сепак, официјалното соопштение за разговорот на двајцата лидери е повнимателно и наведува дека ЕУ и Филипините се при крајот на преговорите, но дека за конечниот договор ќе бидат потребни дополнителни разговори.

— реклама —

Еврокомесарот за трговија Марош Шефчовиќ и филипинската министерка за трговија и индустрија Марија Кристина Алдегер-Роке во одделно соопштение оценија дека е постигнат значаен напредок и дека договорот треба формално да биде заклучен во наредните месеци.

Претходно имаше неизвесност околу динамиката на преговорите, откако Шефчовиќ го откажа планираниот престој во Манила и наместо тоа одржа видеосредба со Алдегер-Роке. Европската комисија разговорот го оцени како фокусиран и продуктивен.

Поголемиот дел од преговарачките поглавја биле усогласени и пред објавата на фон дер Лајен. Сепак, разговорите за јавните набавки сè уште траат. Завршната фаза ја усложнува и предлог-законот на ЕУ за индустријата, кој би можел да го ограничи пристапот до јавни набавки во зелениот и енергетски интензивниот сектор за земји што немаат склучени договори со Унијата во оваа област.