Претседателката на Европската комисија, Урсула фон дер Лајен, им се заблагодари на земјите што преку Механизмот за цивилна заштита на Европската Унија испратија помош за справување со големите пожари во Франција и Шпанија.
Во објава на Инстаграм, Фон дер Лајен истакна дека солидарноста е најдобриот одговор во вакви кризни ситуации и им оддаде признание на сите држави што учествуваат во акцијата.
„Ова е солидарност во своето најдобро издание. Европската Унија е благодарна на секоја земја што овој месец учествува во Механизмот за цивилна заштита за да им помогне на Франција и Шпанија во борбата против пожарите“, напиша таа.
Фон дер Лајен упати и посебна порака до повеќе од 300 пожарникари ангажирани на терен, истакнувајќи дека нивната храброст, пожртвуваност и посветеност го претставуваат најдоброто од Европа.
На објавата се прикажани знамињата на земјите што учествуваат во меѓународната акција, меѓу кои е и Србија.
