Дрон со експлозивна направа бил пронајден во текот на ноќта на аеродромот Лајпциг/Хале во источна Германија, во непосредна близина на украински товарни авиони на компанијата „Антонов“, јавуваат германските медиуми.
Сомнителниот предмет го забележал вработен на аеродромот, по што на терен биле испратени специјализирани полициски екипи со робот за деактивирање експлозивни направи. Експертите го отстраниле детонаторот, а направата потоа била контролирано уништена.
Според „Велт“, дронот бил пронајден само неколку метри од паркиран украински товарен авион „Антонов“. На него имало експлозивна материја за која се сомнева дека е „Семтекс“, а истражителите сметаат дека не дошло до експлозија бидејќи детонаторот не функционирал.
Поради инцидентот, воздушниот сообраќај на аеродромот привремено бил прекинат. Подоцна северната писта повторно била пуштена во употреба, додека јужната останала затворена.
Кратко по пронаоѓањето на дронот, товарен авион на DHL во близина на истиот аеродром се судрил со засега непознат објект. Екипажот безбедно слетал во Хановер, каде што биле констатирани помали оштетувања на предниот дел од леталото. Германските власти проверуваат дали двата инцидента се поврзани.
Истрагата ја водат полицијата на покраината Саксонија, Државното обвинителство во Дрезден и сојузната полиција, со вклучување и на германските безбедносни служби.
Украинскиот амбасадор во Германија, Олексиј Макеев, изјави дека, според него, зад инцидентот би можела да стои Русија. Сепак, германските власти засега не објавиле докази што би го поврзале случајот со Москва, а Русија не се огласи по повод обвинувањата.
Министерот за внатрешни работи на Саксонија, Армин Шустер, го оцени случајот како „многу сериозен безбедносен инцидент“.
