Двајца државјани на Македонија, маж и жена од албанско потекло, загинаа рано утринава во тешка сообраќајна несреќа што се случи на автопатот Белград – Ниш, кај клучката Умчари, пишува српски „Курир“.
Несреќата се случила кога патничко возило „сеат“, со германски регистарски таблички, излетало од патот. Според неофицијални информации, возачот изгубил контрола над возилото, удрил во заштитната ограда и сообраќаен знак, по што автомобилот завршил надвор од коловозот.
Мажот и жената кои се наоѓале во возилото починале на самото место, додека трет патник се здобил со тешки повреди и бил пренесен на болничко лекување.
На местото на несреќата интервенирале итните служби, а увидот и истрагата се во тек. Како можна причина за трагедијата, во текстот на „Курир.рс“ се споменува замор кај возачот, при што не се исклучува можноста тој да заспал зад воланот.
Надлежните органи продолжуваат со истрагата за целосно утврдување на околностите под кои се случила несреќата.
