Две лица за кои американското Министерство за домашна безбедност (DHS) како земја на потекло ја наведува Северна Македонија се појавуваат во јавната база „Worst of the Worst“, во која американските власти објавуваат податоци за странски државјани уапсени од Службата за имиграција и царина (ICE).
Станува збор за Лидија Томески и Владимир Гочевски.
Кај Томески како земја на потекло е наведена Северна Македонија, а како место на апсење – Клинтон, Њу Џерси. Во рубриката „Crimes“ се наведени „Fraud“ (измама), „Fraud – Illegal Use Credit Cards“ (измама – незаконска употреба на кредитни картички) и „Money Laundering“ (перење пари).
Второто лице во базата е Владимир Гочевски. За него DHS наведува дека бил уапсен во Оклахома Сити, Оклахома, додека во рубриката „Crimes“ стои „Dangerous Drugs“ (опасни дроги).
„Worst of the Worst“ е јавна база на американското Министерство за домашна безбедност преку која се објавуваат информации за лица уапсени од ICE, заедно со податоци за нивното потекло и криминалните записи што американските власти ги поврзуваат со нив.
Од самите картички објавени во базата не може да се утврди дали Томески и Гочевски се правосилно осудени за сите наведени дела, ниту каков е нивниот актуелен правен и имиграциски статус.
Исто така, од јавно прикажаните податоци не може да се утврди дали тие во моментов се во притвор, се пуштени на слобода, се депортирани или во меѓувреме е донесена друга одлука во нивните постапки.
