Најмалку четири лица се повредени по силната експлозија која попладнево во четврток предизвика голем пожар во зграда во центарот на Утрехт, еден од поголемите градови во Холандија.
„Неколку згради се урнаа по експлозијата. Четири лица се повредени и пренесени во болница на лекување“, соопштија локалните власти.
Пожарот продолжи и во вечерните часови, а пожарникарите во одредени моменти не можешеа да влезат во погодените објекти поради опасност од ново урнување. Засега не е потврдено дали има уште лица заробени под урнатините.
„Не сме сигурни дали има уште луѓе заробени под урнатините. Полицијата интензивно работи на истрагата“, изјави градоначалничката на Утрехт, Шарон Дајксма.
Во овој густо населен дел на градот е забележана голема материјална штета. Повеќе згради делумно се урнале, се скршени излози и оштетени кровови, а штетата е видлива и надвор од непосредната зона на експлозијата поради силниот ударен бран.
Жителите кои мораа привремено да ги напуштат своите домови поради безбедносни причини се сместени во блискиот хотел. Градот соопшти дека нивниот престој ќе биде обезбеден колку што ќе биде потребно.
Едно повредено лице е лекувано во болница во Утрехт, додека не е познато каде се згрижени останатите три лица. Болницата во меѓувреме го затвори вонредниот режим на работа.
Службите за безбедност засега не претпоставуваат намерен чин. Како можен причинител на експлозијата се разгледува истекување на гас, но официјален заклучок сè уште нема.
На терен се присутни и работници на организациите за помош на жртвите, кои обезбедуваат психолошка поддршка на повредените и сведоците на настанот. Градоначалничката Дајксма се очекува вечерва да се обрати до јавноста со нови информации.
