(Фото) Голем пожар во Романија: евакуирани 300 жители, уништени 32 куќи

Во романското село Совеја, во округот Вранча во Романија, голем пожар зафати населено место и принуди околу 300 жители на итна евакуација, при што 32 куќи се целосно уништени.

Според првичните информации, пожарот избувнал во утринските часови и најверојатно започнал од запален оџак на куќа на постара жителка. Во услови на силен ветер, огнот за кратко време се проширил и прераснал во голема катастрофа.

— реклама —

Мештаните сведочат дека пожарот се ширел со голема брзина, при што искри се пренесувале од објект на објект. Поголем дел од куќите во селото се изградени од дрво, што дополнително го олеснило ширењето на огнената стихија.

„Искри летаа од една куќа на друга. Немавме време да спасиме ништо,“ изјавила една од жителките.

— реклама —

На терен се ангажирани повеќе од 200 пожарникари од шест окрузи, со поддршка од десетици возила и специјализирана опрема. Во акцијата за гаснење учествуваат и противпожарни возила со вода и пена, како и екипи за транспорт и итна медицинска помош.

— реклама —

Иако материјалната штета е значителна, засега нема информации за загинати или тешко повредени лица. Сепак, четири лица добиле напади на паника поради стресот и загубата на имотот.

Евакуираните жители се привремено сместени во локални пансиони и во објекти на спасувачките служби, додека најранливите категории, меѓу кои постари лица и деца, се згрижени кај роднини и соседи.

— реклама —

Ситуацијата во селото се следи, а пожарникарските екипи продолжуваат со активности за целосно локализирање на огнот.