Пожарот кај битолското село Лознани претходно претставувал сериозна опасност за првите куќи во селото, но благодарение на брзата реакција на пожарникарите од Битола и на неколку локални жители била спречена поголема катастрофа, изјави директорот на Дирекцијата за заштита и спасување, Стојанче Ангелов.
Сепак, опасноста сè уште не е мината. Ангелов посочи дека огнот продолжува да се спушта од другата страна на ридот, каде што е распоредена дополнителна екипа на битолските пожарникари.
Постои опасност пожарот од задната страна да го загрози и другото село, предупреди Ангелов, додавајќи дека поради должината на пожарната линија се активирани и тимовите за брз одговор на Дирекцијата за заштита и спасување.
Во Лознани веќе се упатени четири противпожарни возила на Дирекцијата, а дополнителни екипи треба да продолжат со интервенцијата на терен.
Ангелов изрази благодарност до битолските пожарникари и локалните жители кои учествуваат во гаснењето и спречувањето на ширењето на огнот.
