Стотина странски возачи денеска биле запрени на граничниот премин Табановце откако системот „Сејф сити“ претходно регистрирал дека направиле сообраќаен прекршок во Македонија, дознава „Скопје1“.
Системот и досега ги евидентираше возилата со странски регистарски таблички кои поминуваат на црвено светло или се движат со брзина поголема од дозволената, но проблем беше што немаше воспоставен механизам преку кој прекршителите ќе бидат санкционирани пред да ја напуштат државата.
Според информациите на „Скопје1“, денеска на Табановце бил применет нов начин на проверка, при што биле запрени странските возачи за кои системот претходно регистрирал прекршок.
Нашите извори велат дека за оваа намена повторно се ставени во функција старите гранични терминали. Тие останаа неискористени откако беше воведен заедничкиот концепт на контрола, при што Македонија го контролира само влезот, а Србија излезот, на иста локација.
Кога возачот ќе пристигне на стариот терминал, полициски службеник ја проверува регистарската табличка. Доколку системот покажува дека возилото претходно направило прекршок регистриран од „Сејф сити“, возачот се запира и се упатува на друг шалтер за понатамошна постапка. Оние за кои нема евидентиран прекршок можат да продолжат и да ја напуштат државата.
Овој механизам следува по најавите на министерот за внатрешни работи Панче Тошковски дека МВР бара решение како прекршоците на странските возачи да не остануваат само регистрирани, туку и санкционирани.
„Наскоро ќе бидете сведоци на целосната имплементација на вториот чекор, кој се однесува на доставување на казните и за возачите со странски регистарски таблички. Затоа апелирам сите што патуваат низ Македонија да ги почитуваат правилата, бидејќи прекршоците ќе бидат евидентирани и санкционирани“, изјави Тошковски во јули.
Според неофицијалните информации на „Скопје1“, следен чекор е системот да почне поефикасно да ги опфаќа и мотоциклите.
