(Фото) Мадуро објави фотографии од затворот во Њујорк: „Остануваме цврсти“

Поранешниот венецуелски претседател Николас Мадуро објави две досега невидени фотографии од притворот во Њујорк, со порака дека и понатаму останува непоколеблив.

На една од фотографиите Мадуро е облечен во сива тренерка и изгледа послабо отколку во јануари, кога беше уапсен заедно со сопругата Силија Флорес и префрлен во САД по американска воена операција.

— реклама —

Фотографиите, според временската ознака на уредот со кој биле направени, датираат од 25 јуни. Мадуро преку својот профил порачал дека фотографиите ги испраќа како подарок за своите внуци, деца и луѓето што го поддржуваат.

„Сакам да знаете дека сме цврсти“, напишал Мадуро, додавајќи дека нивните срца се исполнети со љубов и оти „Венецуела повторно ќе се роди“.

— реклама —

Пораките беа објавени два дена откако вршителката на должноста претседател на Венецуела, Делси Родригез, постигна договор со САД за експлоатација на нафтените наоѓалишта во земјата.

— реклама —

Мадуро и неговата сопруга се наоѓаат во затвор во Бруклин и се соочуваат со обвиненија за нарко-тероризам, заговор за увоз на кокаин и поседување воено оружје. Двајцата ги негираат обвиненијата, а судењето е закажано за 1 јуни 2027 година.

— реклама —

Според извор близок до поранешниот венецуелски лидер, Мадуро во затвор нема пристап до весници или интернет, но може да разговара по телефон со семејството и адвокатите околу 300 минути месечно, со ограничување од 15 минути по повик.

Неговиот син Николас Мадуро Гера, познат како Николасито, изјавил дека неговиот татко е во добра состојба и дека времето го поминува во проучување на Библијата.