Македонскиот ликовен уметник Синиша Кашавелски со своето дело „Magna Mater“ е дел од престижната 17th/18th International ARC Salon Exhibition, која се одржува во изложбениот простор на Sotheby’s во Њујорк, во организација на Art Renewal Center (ARC). Изложбата беше отворена на 17 јули и ќе трае до 27 јули.
На годинашното издание на ARC Salon се претставени речиси 100 наградени дела од 20 земји, избрани меѓу повеќе од 8.500 пријавени дела од речиси 90 држави. Оваа изложба се смета за една од најзначајните светски манифестации посветени на современата реалистична уметност.
По повод отворањето на изложбата, Кашавелски истакна дека патувањето на „Magna Mater“ започнало во неговото ателје, каде што делото било создавано под првите утрински сончеви зраци, без да претпостави дека еден ден ќе биде изложено во салите на Sotheby’s во Њујорк.
Тој нагласи дека зад секое изложено дело стојат години посветена работа, истрајност, сомнежи и верба дека уметноста може да ги надмине границите на местото каде што е создадена.
„Голема чест ми е што ‘Magna Mater’, наградено дело на 17th International ARC Salon, денес е изложено во Sotheby’s New York како дел од 17th/18th International ARC Salon Exhibition. Благодарам на Art Renewal Center за укажаната доверба, на Sotheby’s New York за домаќинството на изложбата и на сите што низ годините ја поддржуваат мојата работа. Особена чест ми е што на оваа изложба е претставена и Македонија“, порача Кашавелски.
Sotheby’s, основана во Лондон во 1744 година, е една од најстарите и најпрестижни аукциски куќи во светот, а нејзините изложбени простори во Њујорк редовно се домаќини на изложби од меѓународно значење.
