Шест мистериозни метални сфери што минатиот викенд беа исфрлени на плажа во северниот дел на австралиската сојузна држава Квинсленд најверојатно се вселенски отпад, соопшти Австралиската вселенска агенција.
Според агенцијата, станува збор за резервоари под висок притисок што најверојатно потекнуваат од ракета која повторно влегла во Земјината атмосфера. Локалните жители изјавиле дека сферите биле приближно двојно поголеми од кошаркарска топка.
Првично властите ги предупредија граѓаните да не им се приближуваат, но службите за итни случаи подоцна ги отстранија предметите и утврдија дека не претставуваат опасност. Сепак, не се исклучува можноста да бидат пронајдени и други делови од истиот објект.
Австралиската вселенска агенција соопшти дека соработува со меѓународни партнери за да утврди од кое летало потекнуваат сферите и која држава го извршила лансирањето.
Вселенскиот отпад станува сè поголем глобален проблем. Според податоците на американските Вселенски сили, бројот на следени објекти во орбитата се зголемил од околу 23.000 во 2013 година на повеќе од 47.000 во 2024 година.
Иако ретко се случува вселенскиот отпад да падне на Земјата, вакви инциденти се бележат повремено. Во 2023 година на брегот во Австралија беше пронајден триметарски метален цилиндар, а во 2024 година дел од отпад од Меѓународната вселенска станица падна врз куќа во американската држава Флорида.
Според експертите, веројатноста човек да биде погоден од вселенски отпад е исклучително мала, но со зголемувањето на бројот на летала и сателити, прашањето за безбедно управување со отпадот во орбитата станува сè поважно.
