Силното невреме што вчера го погоди Скопје предизвика штета и на еден од најпрепознатливите симболи на градот – часовникот на зградата на Музејот на Град Скопје, кој повеќе од шест децении стои запрен на 5 часот и 17 минути како потсетник на катастрофалниот земјотрес од 26 јули 1963 година.
Според информациите, оштетена е стрелката што ги означува минутите, токму онаа што го означува времето од 5:17 часот – моментот кога разорниот земјотрес го погоди Скопје и кога часовникот престана да работи.
Невремето, проследено со силен ветер и обилни врнежи, зад себе остави голем број оштетувања низ главниот град, а меѓу нив се најде и овој историски споменик, кој со години претставува едно од најпрепознатливите сведоштва за трагедијата што го промени ликот на Скопје.
Часовникот на Музејот на Град Скопје е еден од најзначајните симболи на земјотресот од 1963 година, а неговите стрелки, запрени на 5:17 часот, повеќе од шест децении потсетуваат на моментот кога катастрофалниот потрес го разурна градот. Сега, по вчерашното невреме, и самиот симбол претрпе оштетување.
