(Фото) Пожар во НП Маврово, зафатени 18 хектари шума

Вчера, во 16:30 часот бил забележан пожар на територијата на Националниот парк Маврово, кој зафатил површина од околу 18 хектари. Оттаму информираат дека била опожарена дрвна маса на поединечни стебла од јавор, цреша, слива, како и квалитетна букова шума.

„Благодарение на брзата реакција и големата посветеност на службата за заштита на природата, пожарот беше локализиран во 23:00 часот. Интервенцијата продолжи и во раните утрински часови, од 04:00 до 08:00 часот наредниот ден, кога пожарот беше целосно изгаснат.

— реклама —

Нашите тимови работеа непрекинато со цел да спречат негово повторно активирање и ширење, заштитувајќи ја богатата флора и фауна и целокупниот екосистем на паркот. Благодарение на нивната пожртвуваност, избегнати се поголеми последици.

— реклама —

Апелираме до сите посетители, туристи и локално население да бидат максимално внимателни при движење во природа. Строго се забранува палење оган во шума, фрлање догорчиња од цигари и оставање отпад. Секој невнимателен чекор може да предизвика сериозна штета со долгорочни последици.

Националниот парк Маврово континуирано се грижи за заштита и зачувување на природното наследство и останува целосно посветен на својата мисија. Но, за да ја зачуваме природата, неопходна е заедничка одговорност.

— реклама —

Да ја чуваме природата – таа ни припаѓа на сите“, стои во објавата.