Граѓани алармираат за сериозно оштетување на бетонската конструкција во пролазот на улицата „Пиринска“ во Дебар Маало, кој води кон Амбасадата на Руската Федерација, оценувајќи дека состојбата претставува опасност за сите што секојдневно минуваат низ него.
На фотографиите што ги испратија до редакцијата на „Скопје1“ се гледа распаднат бетон, откриена арматура и оштетена таванска конструкција, при што делови од материјалот веќе се одвоени, а видливи се и дополнителни оштетувања по должината на конструкцијата.
Според граѓаните, пролазот секојдневно го користат пешаци, жители од околните згради и посетители на околните локали, поради што стравуваат дека доколку не се преземе навремена санација, може да дојде до несреќа.
