Три случаи на нелегално исфрлање шут и градежен отпад биле откриени вчера вечер во Скопје, соопшти градоначалникот Орце Ѓорѓиевски, кој најави дека против сторителите ќе бидат изречени глоби и дополнителни санкции доколку не го отстранат отпадот.
Според Ѓорѓиевски, две од локациите се во општина Аеродром, а третата е на улицата „Рузвелтова“ во централното градско подрачје.
„Вечерва, на три локации во Скопје – две во Аеродром и една во централното градско подрачје, на улицата „Рузвелтова“, беа затекнати лица при нелегално исфрлање шут и отпад, со што директно се загрозуваат животната средина, здравјето на граѓаните и изгледот на нашиот град“, објави Ѓорѓиевски.
Тој посочи дека сторителите се идентификувани и евидентирани, а утре ќе треба да се јават во просториите на Град Скопје, каде ќе им бидат изречени глоби согласно законските прописи.
„Дополнително, наложено им е уште вечерва да го подигнат отпадот и да го однесат на соодветна депонија, со задолжително приложување кантарска белешка како доказ. Доколку тоа не го сторат, ќе следуваат нови санкции“, наведува градоначалникот.
Тој порача дека Град Скопје нема да толерира вакво однесување и дека инспекциските служби ќе продолжат со засилени контроли.
„Сакам да бидам јасен – нема да дозволам поединци да го грдат лицето на Скопје, да го загадуваат просторот во кој живееме и да ја загрозуваат иднината на нашите деца. За вакви појави нема оправдување. За вакво однесување нема толеранција. За уништување на Скопје – ќе има одговорност“, истакна Ѓорѓиевски.
Тој ги повика граѓаните да придонесат за зачувување на чистотата на градот и потсети дека инспекторите се на терен 24 часа дневно.
„Апелирам до сите граѓани: да го чуваме Скопје како сопствен дом. Да не дозволиме неодговорноста на поединци да ја поништи работата, трудот и желбата на илјадници скопјани кои сакаат чист, уреден и достоинствен град“, порача градоначалникот.
