Трагедија се случила во близина на водопадот Савица во Бохињ, Словенија, откако седумгодишно момче паднало во провалија, а неговиот 44-годишен татко, откако ги слушнал неговите крици, тргнал кон него и исто така паднал.
Според словенечката полиција, станува збор за четиричлено семејство од странство, кое било во посета на водопадот Савица. Засега не е соопштено од која земја е семејството.
На враќање од водопадот, семејството застанало кај одморалиште со маса и клупи. Во еден момент седумгодишното момче се оддалечило од останатите членови, по што тие ги слушнале неговите крици.
Таткото тргнал кон местото од каде што доаѓале криците, но притоа паднал во провалијата.
Спасувачите ги пронашле таткото и детето во коритото на реката Савица. 44-годишниот маж им подлегнал на повредите, додека тешко повреденото момче со хеликоптер било пренесено во Универзитетскиот клинички центар во Љубљана.
Засега нема нови официјални информации за здравствената состојба на детето.
Од Горската спасувачка служба Бохињ соопштија дека нивните членови во моментот кога била пријавена несреќата биле на вежба во непосредна близина, поради што речиси веднаш можеле да се упатат кон местото.
„Се спуштивме кон коритото, кое се наоѓаше нешто помалку од 60 метри под нас“, навеле спасувачите.
Точната висина од која паднале детето и неговиот татко засега не е позната.
Спасувачите го подготвиле момчето за хеликоптерски транспорт, додека телото на неговиот татко од тешко пристапниот терен било извлечено со помош на јажиња.
Полицијата продолжува со собирање информации за сите околности на несреќата, по што ќе ги извести надлежните органи.
Од Горската спасувачка служба Бохињ посочиле дека планинските несреќи ретко се последица само на една грешка.
Според нив, почесто станува збор за низа околности, случајности и погрешни одлуки кои во одреден момент се спојуваат и доведуваат до несреќа.
Спасувачите изразиле надеж дека момчето што побрзо и што подобро ќе закрепне.
