(Фото) Трамп сподели лажна приказна создадена со вештачка интелигенција за неговата помош на повредено момче

Американскиот претседател Доналд Трамп сподели на својата социјална мрежа „Трут соушл“ приказна во која е претставен како човек што му помогнал на тешко повредено момче, но дел од деталите во објавата се неточни. Текстот е проследен со фотографии создадени со вештачка интелигенција, на кои Трамп го прегрнува момчето во инвалидска количка.

Станува збор за Џим, синот на американскиот министер за внатрешна безбедност Марквејн Мулин, кој во 2020 година, на 15-годишна возраст, претрпел тешка повреда на мозокот. Трамп не ја напишал приказната, туку без дополнителен коментар ја споделил објавата на друг корисник.

— реклама —

Во неа се тврди дека момчето по повредата не ги препознавало ниту своите родители, но знаело дека Доналд Трамп е претседател на САД. Понатаму се наведува дека Трамп лично го контактирал семејството, испратил приватен авион за да го пренесе момчето во рехабилитациски центар во Калифорнија и секојдневно му се јавувал за време на изборната кампања. Приказната опишува и посета на Трамп, при која тој наводно одбивал да си замине и покрај предупредувањата од соработниците.

Сепак, јавното сведочење на Мулин пред американскиот Сенат на 18 март оваа година открива поинаква слика за дел од настаните.

— реклама —

Мулин потврдил дека неговиот син на 17 јануари 2020 година претрпел тешка повреда на мозокот и се разбудил дури по 26 часа. Џим морал повторно да учи да оди и да чита, имал сериозни проблеми со краткорочното паметење и не можел да решава ниту едноставни математички задачи.

Тој го потврдил и деталот дека момчето во почетокот не ги препознавало родителите, но на прашањето кој е претседател на САД го изговорило името на Трамп.

— реклама —

Еден од неточните делови во вирусната објава се однесува на приватниот авион. Според сведочењето на Мулин, Трамп навистина понудил семејството да го искористи неговиот авион, но понудата била одбиена бидејќи здравствената состојба на момчето не му дозволувала да лета. Наместо тоа, семејството патувало со автомобил.

Неточен е и приказот дека посетата на Трамп се одвивала без присуство на камери. Мулин пред сенаторите изјавил дека камерите биле присутни кога претседателот пристигнал во рехабилитацискиот центар во Бејкерсфилд, а момчето било покането и на сцената.

— реклама —

Потоа, Трамп поминал време со Џим во посебна просторија. Според сведочењето на неговиот татко, соработниците неколкупати го потсетувале дека треба да продолжи со патувањето, но тој останал уште 15 минути. Мулин раскажал дека средбата му помогнала на момчето повторно да почне да памети нови информации.

Трамп и претходно објавувал содржини создадени со вештачка интелигенција. Асошиејтед прес известувал за фотографии и видеоснимки на кои американскиот претседател бил прикажан како суперхерој, воен победник и моќен државник. Во август тој споделил и вештачки создадена фотографија на која позира со американските генерали Џорџ Патон и Даглас Мекартур.