Франција гази сè пред себе кон финалето на Светското првенство

Француската репрезентација е главен фаворит во полуфиналето против Шпанија на Светското првенство, оценува шпанскиот весник „Ас“, истакнувајќи дека „триколорите“ досега прикажале најдобар фудбал на турнирот.

— реклама —

Според анализата, Франција оставила впечаток на најмоќна селекција благодарение на убедливите настапи, одличната физичка подготвеност и извонредната форма на своите најголеми ѕвезди. Сепак, шпанскиот медиум нагласува дека токму поради тоа целиот притисок сега е врз Французите, кои се очекува да ја освојат титулата.

Франција е единствената репрезентација што ги доби сите шест натпревари во регуларните 90 минути. На патот до полуфиналето ги совлада Сенегал, Ирак, Норвешка, Шведска, Парагвај и Мароко, постигнувајќи 16 голови, односно повеќе од три по натпревар.

— реклама —

Во нападот блеска Килијан Мбапе со осум погодоци, додека Усман Дембеле постигна пет гола. Бредли Баркола и Дезире Дуе додадоа по еден погодок, а одлични партии прикажува и Михаел Олисе, кој со пет асистенции е најдобар додавач на турнирот и е само една асистенција од рекордот на Пеле од Светското првенство во 1970 година.

— реклама —

Статистиката дополнително ја потврдува доминацијата на Франција. Тимот на Дидие Дешан има најголем просечен посед на топката на турнирот – 64 проценти, а воедно е и селекцијата со најмногу удари кон противничкиот гол. На шест натпревари Французите упатија 110 удари, од кои 47 беа во рамките на голот.

Благодарение на добрите резултати, Франција се искачи и на првото место на ранг-листата на ФИФА, оставајќи ја зад себе Аргентина.

„Ас“ заклучува дека Шпанија ја очекува исклучително тешка задача доколку сака да ја запре репрезентацијата која во моментов изгледа како најкомплетниот тим на Светското првенство.