Франција ќе ги анализира новите царини на Трамп, најавен принцип на реципроцитет

Францускиот претседател Емануел Макрон изјави дека одлуката на Врховен суд на САД за трговските царини воведени од американскиот претседател Доналд Трамп претставува потсетник за значењето на поделбата на власта и владеењето на правото во демократските системи.

— реклама —

Говорејќи на годишниот земјоделски саем во Париз, Макрон посочи дека „не е лошо да се има Врховен суд и, соодветно на тоа, владеење на правото“, алудирајќи на пресудата со која се оценува дека дел од царините воведени врз основа на закон за економска вонредна состојба се незаконски.

— реклама —

Францускиот претседател нагласи дека е важно во демократиите да постои рамнотежа меѓу институциите и механизми за контрола на извршната власт. Во однос на новите глобални царини од 10 отсто што ги најави администрацијата на Трамп, Макрон рече дека Франција внимателно ќе ги анализира последиците и ќе се приспособи на новонастанатата ситуација.

— реклама —

Тој додаде дека Франција има интерес да продолжи со извозот на своите производи, меѓу кои земјоделски производи, луксузна и модна стока, како и делови за воздухопловната индустрија. Според него, најправедниот пристап во вакви околности е принципот на реципроцитет, наместо прифаќање на еднострани одлуки.

— реклама —

Со ваквите ставови, Париз сигнализира дека ќе бара балансиран и правно заснован одговор на новите трговски мерки, во рамки на европските и меѓународните механизми.