Педесет и четиригодишен жител на Тетово е лишен од слобода откако, според полицијата, фрлал вреќи со отпад во реката Пена.
Од Министерството за внатрешни работи информираат дека на 30 јуни околу 18:00 часот, полициски службеници од СВР Тетово го привеле Б.С. (54) од Тетово поради сомнение дека сторил кривично дело „загадување на животната средина и природата“.
До расчистување на случајот дошло по објавување видео на социјалните мрежи, на кое се гледа лице кое со патничко возило „цитроен“ со тетовски регистарски ознаки фрла вреќи со непознат отпаден материјал во реката Пена, во близина на улицата „Видоје Смилевски-Бато“.
По преземените мерки, полицијата го идентификувала и пронашла осомничениот, кој во службен разговор го признал делото.
За случајот е известен јавен обвинител, а по неговото целосно документирање против осомничениот ќе биде поднесена соодветна пријава.
