Претседателот на Собранието, Африм Гаши, по повод 25-годишнината од потпишувањето на Охридскиот рамковен договор порача дека неговото значење треба да се гледа надвор од политичките разлики и секојдневните толкувања.
Во обраќањето до граѓаните, Гаши оцени дека договорот бил политички и институционален одговор на кризата и поставил мирот, дијалогот и еднаквоста како основа за градење одржливо општество.
„Охридскиот договор останува важен столб на уставната и институционалната архитектура на нашата држава“, наведува Гаши, додавајќи дека денешната одговорност е неговите поуки да се преточат во одржливи демократски стандарди и соживот.
Според него, Северна Македонија е заеднички дом за сите граѓани, а нејзината сила не треба да се бара во разликите што ги делат луѓето, туку во способноста тие разлики да се претворат во заеднички вредности.
По четвртина век од потпишувањето на договорот, Гаши смета дека фокусот треба да биде ставен и на тоа што денешните генерации ќе им го остават на идните.
„Нека оваа годишнина биде заедничка обврска: денешната политичка генерација и институции го зачувуваат мирот преку дијалог, ја зајакнуваат еднаквоста и го градат соживотот преку дела“, порача претседателот на Собранието.
Тој додава дека идните генерации треба да го наследат Охридскиот договор како историска пресвртница и како вредност што продолжува да се живее во секојдневието.
