Охридскиот рамковен договор – политичкиот документ што ја запечати мирната иднина на Македонија!
Охридскиот рамковен договор, со кој во 2001 година беше прекинат вооружениот конфликт во Македонија, претставува еден од клучните политички документи во поновата историја на државата. Потпишан е точно пред 24 години на денешен ден, во претседателската резиденција на Водно од тогашниот претседател Борис Трајковски, премиерот Љубчо Георгиевски, лидерите Бранко Црвенковски, Имер Имери и Арбен Џафери, како и од специјалните претставници на Европската унија и на САД, Франсоа Леотар и Џејмс Пердју. Преговорите што му претходеа започнаа во Скопје, а продолжија во Охрид, со вклучување на бројни советници и експерти.Од неговото спроведување досега се донесени повеќе од 130 закони и измени, од кои најголем дел – 59 се поврзани со недискриминација и правична застапеност, а 40 со идентитет, култура, образование и децентрализација. За таа цел беше формиран Секретаријат за спроведување на договорот, кој во 2019 година прерасна во Министерство за политички систем и односи меѓу заедниците.Во документот меѓу основните принципи стои:„Целосно и безусловно се отфрла употребата на насилство за остварување политички цели. Само мирни политички решенија можат да ја загарантираат стабилната и демократска иднина на Македонија. Суверенитетот и територијалниот интегритет на Македонија, и унитарниот карактер на државата се неповредливи и мора да се сочуваат. Не постојат територијални решенија за етничките прашања. Мултиетничкиот карактер на македонското општество мора да се сочува и да најде свој одраз во јавниот живот. Една современа демократска држава, во природниот тек на својот развој и созревање, мора постојано да обезбеди нејзиниот Устав целосно да ги исполнува потребите на сите нејзини граѓани во согласност со највисоките меѓународни стандарди, коишто и самите постојано се развиваат. Развојот на локалната самоуправа е од суштествено значење за поттикнување на учеството на граѓаните во демократскиот живот, и за унапредување на почитувањето на идентитетот на заедниците.“Договорот опфаќа прекин на непријателствата, децентрализација, недискриминација и правична застапеност, посебни собраниски процедури, образование и употреба на јазиците, изразување на идентитет и мерки за имплементација, а е дополнет со три анекси: А – уставни амандмани, Б – измени во законодавството и Ц – мерки за градење доверба и завршни одредби.
Македонија | пред 5 месеци