Генералниот секретар на Интерпол во посета на Полициската академија: Обуката и меѓународната соработка се клучни за современо полициско работење

Генералниот секретар на Интерпол, Валдеси Уркиза, кој престојува во официјална посета на земјава, денеска заедно со министерот за внатрешни работи Панче Тошковски ја посети Полициската академија при Министерството за внатрешни работи во Идризово.

Пред кадетите, раководството на МВР и претставниците на Академијата, Уркиза и помошник-министерот во Полициската академија, Влатко Митковски, ја истакнаа важноста на современото полициско образование, континуираното стручно усовршување и меѓународната полициска соработка во справувањето со современите безбедносни закани.

— реклама —

Уркиза нагласи дека полициските академии претставуваат темел на секоја современа полициска служба, бидејќи токму таму се создаваат идните генерации професионални полициски службеници.

„Институции како оваа Полициска академија се столбот на полициското работење ширум светот. Криминалот станува сè покомплексен, а начинот на кој полицијата се обучува мора постојано да се развива за успешно да одговори на новите закани“, истакна генералниот секретар на Интерпол.

— реклама —

Тој посочи дека денешните безбедносни предизвици имаат меѓународна димензија и дека токму затоа прекуграничната полициска соработка е од суштинско значење.

„Од она што го видов за време на мојата посета – од соработката на границата со Албанија до заедничките патроли со српската полиција – јасно е дека Северна Македонија сериозно ја сфаќа меѓународната полициска соработка. Токму тоа го прави Интерпол сè поважен партнер во борбата против организираниот криминал“, рече Уркиза.

Тој потсети дека од ноември 2025 година Полициската академија е дел од Глобалната академска мрежа на Интерпол, во која членуваат само 28 полициски образовни институции во светот, што претставува значајно признание за нејзините професионални капацитети.

— реклама —

Помошник-министерот Влатко Митковски нагласи дека Академијата останува посветена на развојот на современ образовен систем усогласен со највисоките меѓународни стандарди.

„Само преку континуирана едукација, примена на најдобрите меѓународни практики и партнерство со водечките светски полициски организации можеме да создадеме генерации професионални полициски службеници подготвени да одговорат на сè покомплексните безбедносни предизвици“, изјави Митковски.

— реклама —

За време на посетата беа презентирани капацитетите на Полициската академија, образовните програми и активностите што МВР ги спроведува за модернизација на полициската обука и нејзино усогласување со европските и меѓународните стандарди.

Од Министерството за внатрешни работи оценуваат дека посетата на генералниот секретар на Интерпол претставува потврда за успешната соработка меѓу двете институции и заедничката заложба за јакнење на професионалните капацитети и борбата против организираниот и прекуграничниот криминал.