Општина Центар ги интензивира активностите за справување со последиците од силното невреме, откако градоначалникот Горан Герасимовски свика состанок на Штабот за заштита и спасување, на кој присуствуваа раководители на општинските сектори, претставници на МВР, ЈП ПОЦ и други надлежни служби.
На состанокот беа донесени повеќе итни мерки, меѓу кои формирање комисија за проценка на штетите, задолжување на куќните совети да извршат проверка на безбедноста на фасадите и покривите на станбените објекти, како и апел до општествено одговорните компании да се вклучат со своја механизација во расчистувањето на паднатите кровни конструкции.
Дополнително, хигиеничарите на ЈП ПОЦ ќе работат во повеќе смени за постојано да бидат присутни на терен и да учествуваат во отстранувањето на паднатите дрвја, гранки и други остатоци од невремето.
„Безбедноста сега е клучна. Мора да има координација меѓу куќните совети и станарите, а солидарноста и одговорноста мора да бидат на високо ниво. Нашите екипи на терен се поделени во две смени, а попладневната екипа е подготвена да реагира и доколку има ново невреме. Дополнително, и администрацијата во Општината доби наредба да се вклучи во напорите за расчистување. Сите сили мора да ги впрегнеме заедно, затоа што станува збор за елементарна непогода“, изјави Герасимовски.
Во текот на синоќешните и денешните активности се расчистени повеќе локации во Центар. Со тешка механизација се отстранети лимени конструкции од кровови во Буњаковец, на улицата „Благоја Давков“, спроти трговскиот центар „Рамстор“ и кај „Агромеханика“, а паралелно се расчистуваат паднати дрвја, гранки и шут на повеќе улици.
Градоначалникот повторно апелираше до граѓаните да бидат внимателни и активно да се вклучат во заедничките активности за побрзо санирање на последиците од невремето.
