Герасимовски: Не со манипулации, туку со факти – новиот нацрт-ДУП ја намалува површината за градба за 14.000 квадратни метри

Градоначалникот на Општина Центар, Горан Герасимовски, ги отфрли обвинувањата на Движењето ЗНАМ во врска со новиот нацрт на Деталниот урбанистички план (ДУП), оценувајќи дека станува збор за политички манипулации и неточни толкувања на урбанистичката документација.

— реклама —

Според Герасимовски, предложениот нацрт-ДУП предвидува вкупна бруто-изградена површина од 29.459 квадратни метри, што е за околу 14.000 квадратни метри, односно за приближно 33 проценти помалку во однос на претходните плански решенија, кои предвидувале 43.429 квадратни метри.

— реклама —

Тој нагласи дека тврдењата за нова бетонизација не се засноваат на факти и дека Деталниот урбанистички план мора да биде усогласен со Генералниот урбанистички план, при што единствена надлежна институција за утврдување на таа усогласеност е Град Скопје.

Герасимовски посочи дека актуелниот документ е работна верзија – нацрт-план, кој, по завршувањето на јавната анкета, повторно ќе биде доставен до надлежните институции на мислење, согласно законската процедура.

— реклама —

Во реакцијата тој ги отфрли и тврдењата за ризик од ерозија и свлечишта, наведувајќи дека за таквите обвинувања не се приложени официјални стручни анализи или мислења од надлежни институции.

Од Општина Центар порачаа дека постапката за донесување на ДУП ќе продолжи транспарентно, со почитување на законските процедури, мислењата на надлежните институции и јавниот интерес.