Градоначалникот на Општина Центар, Горан Герасимовски, ги повика граѓаните активно да го користат ГИС порталот – дигитална платформа што овозможува брз и транспарентен пристап до општинските услуги, информации и тековни проекти.
Порталот е достапен на: https://gis.centar.gov.mk/NexusPublicPortal/PublicPortal/Map
Како што информираат од Општината, преку едноставна регистрација граѓаните можат на едно место да ги следат сите новости, јавни повици, инфраструктурни проекти, културни настани и други активности на локалната самоуправа.
„Нашата цел е преку современи алатки да ја подобриме комуникацијата со граѓаните, да ја зголемиме транспарентноста и да овозможиме полесен пристап до општинските услуги“, изјави Герасимовски.
Порталот овозможува и учество во анкети, консултации и граѓански форуми, како и електронско поднесување барања за извод од Детален урбанистички план.
Меѓу најкористените функционалности е модулот за градинки, преку кој родителите можат да имаат увид во присуството на своите деца, известувањата и другите информации поврзани со престојот во градинка.
Во рамки на ГИС порталот се достапни и 3Д приказ на општината, Зелен катастар, како и податоци за јавната инфраструктура, сообраќајната мрежа и останатите просторни информации од интерес за граѓаните.
