Герасимовски по невремето: Работевме цела ноќ, екипите и денес се на терен

Екипите на Општина Центар и денес продолжуваат со расчистување на последиците од силното невреме, откако во текот на ноќта интервенираа на повеќе локации низ општината.

— реклама —

Веднаш по невремето беше одржан итен состанок на Општинскиот штаб за заштита и спасување, по што сите расположливи служби беа испратени на терен за да интервенираат на најкритичните места.

Во текот на ноќта беа расчистени повеќе локации во Капиштец, Дебар Маало, населбата Пролет и околината на Соборниот храм. Интервенции имаше и во Буњаковец, како и на други места каде што беа пријавени паднати дрвја, оштетувања и потенцијални опасности за граѓаните.

— реклама —

„Работевме до доцна во ноќта, а уште од раните утрински часови повторно сме на терен. Наш приоритет е што побрзо да ги отстраниме сите опасности и да ја нормализираме состојбата. Им благодарам на сите служби за нивната посветеност, како и на граѓаните за трпението, разбирањето и навремените пријави“, изјави градоначалникот Горан Герасимовски.

— реклама —

Од Општина Центар ги повикуваат граѓаните и понатаму да пријавуваат паднати дрвја, оштетувања на инфраструктурата и други ризични ситуации, со цел службите да можат навремено да реагираат.

Воедно, од општината апелираат до жителите, доколку се во можност, да помогнат во расчистувањето на дворовите и просторот пред своите домови, за побрзо надминување на последиците од невремето.

Екипите ќе останат на терен и во текот на денот, а интервенциите ќе продолжат според приоритетите и пријавите што пристигнуваат од граѓаните.