Германија инвестира многу во борбени дронови, но во Украина тие не ги погодуваа целите

Германија се подготвува да инвестира 267,7 милиони евра во нов систем за борбени беспилотни летала HX-2 од одбранбениот стартап Хелсинг, како дел од поширокиот план за модернизација на Бундесверот. Сепак, податоците од нивната употреба во Украина отвораат сериозни прашања за реалната ефикасност на системот.

Според информации на „Политико“, дроновите HX-2 во украинските услови погодиле цел во околу 36 отсто од мисиите, односно во пет од 14 случаи. Во извештаите се наведува дека најголем дел од неуспесите не се должат на руски контрамерки, туку на технички проблеми, меѓу кои нестабилен видео-пренос, ограничувања при насочување и нефлексибилни сензорски системи.

— реклама —

Планот на Берлин предвидува набавка на 4.350 дронови HX-2, заедно со симулатори, опрема за обука и техничка поддршка. Хелсинг, пак, јавно ја истакнува нивната употреба во Украина како доказ за сигурноста на системот и наведува дека дроновите се одобрени за борбена употреба и интегрирани во украинскиот воен команден систем.

— реклама —

Од компанијата тврдат дека за време на тестирањата во Германија, Обединетото Кралство и на вежби со британската армија во Кенија, HX-2 постигнал стапка на погодок од речиси 100 отсто. Во исто време, Хелсинг предупредува дека украинските податоци се засноваат на „мал двоцифрен број“ распоредени дронови и дека тоа не овозможува сигурна статистичка проценка.

Останува нејасно дали дроновите што Германија планира да ги купи се идентични со оние користени во Украина или станува збор за понова верзија. Поради клаузули за доверливост, компанијата одби да открие детали за евентуалните технички разлики.

— реклама —

Двајца извори запознаени со процесот на набавки изјавиле за „Политико“ дека германското Министерство за одбрана ги анализира украинските податоци во својата проценка, но официјален коментар засега нема.

Договорот е рамковен и предвидува можност за дополнителна набавка на уште 20.000 дронови, што би можело значително да ја зголеми неговата вкупна вредност. Германскиот парламент, кој мора да ги одобри сите воени договори над 25 милиони евра, треба да се изјасни до крајот на февруари.

Во меѓувреме, „Блумберг“ објави дека Германија планира дел од пошироката набавка на ваква муниција да ја подели и со друг производител, со цел да избегне зависност од еден добавувач. Случајот повторно ја отвора дилемата со која често се соочува Бундесверот – како да се балансира итната воена потреба со реалните перформанси на скапата нова опрема, особено кога тестирањето доаѓа од активна воена зона.