Германија подготвува ограничување на цените на бензинот и дизелот

Германската влада подготвува закон со кој ќе може привремено да ги ограничи цените на бензинот и дизелот доколку тие растат значително побрзо отколку во останатите земји од Европската Унија.

— реклама —

Предлогот го подготвила министерката за економија Катерина Рајхе, а според нацрт-законот, мерката би можела да се активира доколку цените на горивата во Германија бележат натпросечен раст во текот на три последователни недели, објави „Шпигел“.

— реклама —

Ограничувањето би можело да трае најмногу три месеци, но примената на мерката би била прекината доколку се појави опасност за сигурноста на снабдувањето со гориво. Целта е да се спречат прекумерни поскапувања без да се наруши редовното снабдување.

Претставниците на владејачката коалиција, составена од ЦДУ/ЦСУ и СПД, уште во средината на септември се договориле да разговараат со нафтената индустрија за воведување ограничувања по примерот на Луксембург и Белгија. Планот е мерката да биде подготвена најдоцна до 1 јануари 2027 година.

— реклама —

Германија претходно привремено ги намали даноците на бензинот и дизелот за 16,7 евроценти по литар, во периодот од 1 октомври до крајот на декември. Според проценките, просечен возач кој месечно поминува околу 900 километри би можел да заштеди од 32 до 36 евра во текот на трите месеци, при потрошувачка од седум до осум литри на 100 километри.

— реклама —

Германската влада очекува намалувањето на даноците да ги намали приходите во државната каса за околу 2,485 милијарди евра.