Германија пушта 16 милиони барели нафта од резервите за да го ублажи растот на цените

Германија ќе пушти на пазарот дополнителни количества нафта и нафтени деривати од државните резерви за да го ублажи растот на цените и да обезбеди непречено снабдување. Германскиот Бундесрат денеска го усвои предлогот на Министерството за економија за привремено намалување на задолжителното ниво на резерви, објави „Ројтерс“.

— реклама —

Според новата уредба, резервите привремено ќе треба да покриваат 82 дена потрошувачка, наместо досегашните 90 дена. Со ова ќе се овозможи на пазарот да бидат пуштени околу 16 милиони барели нафта и нафтени деривати.

Германија во март, во рамките на договорот меѓу членките на Меѓународната агенција за енергија (ИЕА), се обврза да ослободи 19,5 милиони барели нафта и нафтени производи од своите резерви. Договорот опфаќаше вкупно 425 милиони барели од резервите на сите членки, со цел да се обезбеди снабдувањето и да се ограничи растот на цените предизвикан од војната на Блискиот Исток.

— реклама —

Германија веќе во март ослободи 600.000 тони сурова нафта и нафтени деривати, што одговара на околу 3,5 милиони барели, објави германската телевизија НТВ. Од таа количина, компаниите презеле околу 470.000 тони. Новата уредба ќе овозможи на пазарот да бидат пласирани и преостанатите 16 милиони барели.

— реклама —

Меѓународната агенција за енергија вчера соопшти дека нејзините членки ќе ја забрзаат примената на мартовскиот договор и ќе ослободат дополнителни 100 милиони барели нафта и дизел. Според податоците на агенцијата, досега од резервите биле пуштени околу 330 милиони барели.

Членките се договориле да ги преземат сите потребни мерки за навремено ослободување на преостанатите количества, имајќи ги предвид околностите во секоја земја. Од агенцијата наведуваат дека веќе се спроведуваат конкретни планови за забрзување на постапката.

Дополнително, членките најавиле дека уште 20 милиони барели од резервите ќе бидат пуштени на пазарот „што е можно поскоро“. На почетокот на октомври, ИЕА соопшти дека во првите 20 дена приоритет ќе има ослободувањето на резервите на дизел.