Германските енергетски компании предупредуваат дека би можеле да имаат сериозни проблеми со навременото полнење на складиштата за природен гас пред почетокот на зимата. Во моментов складиштата се исполнети со околу 50 отсто од капацитетот, а првичната цел од 80 отсто е намалена на 70 отсто.
Претседателката на Сојузот на енергетски компании на Германија (BDEW), Керстин Андреае, оцени дека и намалената цел е „многу амбициозна“.
„Осумдесет проценти исполнетост на складиштата е многу висока бројка ако се земе предвид дека моментално сме на 50 отсто. Технички едноставно не е возможно да се достигне тоа ниво“, изјави Андреае за јавниот сервис Deutschlandfunk.
Според неа, пазарот на гас годинава е нарушен поради војната со Иран, додека високите цени ги тераат набавувачите да ја одложуваат куповината. Во истиот период минатата година германските складишта биле исполнети со 67 отсто од капацитетот.
Андреае смета дека државата би можела преку даночни олеснувања да им помогне на енергетските компании полесно да купуваат гас по повисоки цени. Сепак, предупреди дека прекумерното мешање на државата на пазарот би можело повторно да доведе до значително зголемување на цените, како што се случи во 2022 година.
Ситуацијата денес е различна од кризата во 2022 година, кога Германија беше многу позависна од рускиот гас. Во меѓувреме, земјата изгради повеќе терминали за течен природен гас, а увозот е зголемен од земји како Норвешка, Катар и САД.
Германската влада засега оценува дека нема непосредна опасност од недостиг на гас во текот на претстојната зима, но истовремено порача дека е подготвена да реагира доколку состојбата во наредните недели се влоши.
