Германскиот буџет за 2027 година предвидува рекордно задолжување и повисоки трошоци за одбрана

Германија во 2027 година планира да потроши околу 561 милијарда евра, но за покривање на предвидените расходи ќе мора да се задолжи за дополнителни 123 милијарди евра. По речиси 16 часа преговори, буџетскиот одбор на Бундестагот го усогласи предлог-буџетот, за кој конечната расправа и гласањето се закажани за 27 ноември, објави Дојче веле.

Со вклучувањето на задолжувањето преку посебните фондови за одбрана и обновување на инфраструктурата, вкупниот износ на новиот долг ќе надмине 210 милијарди евра. Тоа би било второ највисоко ниво на задолжување во историјата на Сојузна Република Германија, веднаш зад рекордните 215,4 милијарди евра од 2021 година, кога земјата се соочуваше со пандемијата на ковид-19.

— реклама —

Опозициските партии остро го критикуваа предлог-буџетот, оценувајќи го како неодржлив и неодговорен кон идните генерации. Претставници на Зелените и Левицата предупредија на огромниот јавен долг, додека од Алтернатива за Германија посочија дека владата, според нивните пресметки, секоја минута се задолжува за нови 400.000 евра.

Растот на расходите е поврзан со повеќе предизвици: војната во Украина, потребата од модернизација на германската војска, слабеењето на економијата, стареењето на населението, обновата на инфраструктурата и преминот кон обновливи извори на енергија.

Еден од главните приоритети е одбраната. Германија планира до 2027 година нејзиниот буџет за оваа намена да го зголеми на нешто помалку од 110 милијарди евра, што е за околу 27 милијарди повеќе во споредба со претходната година. Дополнителни средства ќе бидат обезбедени и преку посебниот фонд за модернизација на Бундесверот. Берлин, исто така, најавува дека ќе продолжи да ѝ помага на Украина политички, финансиски, хуманитарно, цивилно и воено.

— реклама —

Најголемата буџетска ставка, сепак, ќе биде Министерството за труд и социјални прашања, чии расходи ќе надминат 200 милијарди евра. И покрај планираните заштеди во одредени области, трошоците за пензии значително ќе пораснат поради зголемувањето на бројот на пензионери и намалувањето на работоспособното население.

Во 2025 година за исплата на пензии биле издвоени 420 милијарди евра, од кои државата обезбедила 127 милијарди. Се очекува државните субвенции до 2027 година да се намалат за околу три милијарди евра, што ќе придонесе за зголемување на придонесите за задолжително пензиско осигурување. Нивната стапка би можела да достигне нешто помалку од 20 отсто од бруто-платата. За Сојузната агенција за вработување, пак, се предвидени субвенции од државниот буџет во износ поголем од осум милијарди евра.

— реклама —

Промената е значителна во споредба со периодот од 2014 до 2019 година, кога Германија шест години по ред успеваше да одржи избалансиран буџет без ново задолжување. Таканаречената политика на „црна нула“ заврши со почетокот на пандемијата во 2020 година.

И покрај зголемувањето на долгот, Германија и понатаму има релативно поволна позиција во споредба со други големи економии. На крајот на 2025 година, јавниот долг изнесувал 63,5 отсто од бруто-домашниот производ. За споредба, во Франција тој надминува 110 отсто, во Италија се движи меѓу 135 и 140 отсто, додека во САД е значително над 100 отсто.

Сепак, германските економски експерти предупредуваат дека продолжувањето на сегашниот тренд на задолжување може до 2040 година да го зголеми односот на долгот кон БДП на 100 отсто. Тоа би можело да го загрози и највисокиот кредитен рејтинг на земјата, познат како ААА, кој ѝ овозможува да се задолжува по поповолни каматни стапки.

— реклама —

Дополнителен товар за буџетот ќе бидат и каматите, за кои до 2027 година се очекува да бидат издвоени околу 42 милијарди евра.

Пред конечната расправа во Бундестагот останува отворено и прашањето за можното намалување на данокот на електрична енергија. Во владината коалиција постојат несогласувања околу спроведувањето на оваа мерка, која претходно ја најави канцеларот Фридрих Мерц. Претставникот на ЦДУ, Матијас Миделберг, предупреди дека владата треба да ги исполни ветувањата дадени пред граѓаните; во спротивно, тие со право би можеле да бидат разочарани.