Ѓорѓиевски најави 6.000 нови дрвја во Скопје до крајот на сезоната, започна садењето на првите 3.500

Во Скопје започна акција за засадување 3.500 нови садници, а до крајот на сезоната е планирано нивниот вкупен број да достигне 6.000, најави градоначалникот на Град Скопје, Орце Ѓорѓиевски.

Според најавата, акцијата ќе ги опфати сите скопски општини, со засадување нови дрвја во постојните и новите паркови, зелените површини долж булеварите и другите јавни простори низ градот.

— реклама —

„Секое ново дрво е влог во градот во кој живееме и во иднината на нашите деца. Повеќе сенка за летните денови, почист воздух и повеќе зелени места за прошетки, игра и дружење!“, порача Ѓорѓиевски.

Тој истакна дека целта на акцијата е обновување на постојното зеленило и раззеленување на јавните површини, со што треба да се подобрат условите за живот во главниот град.

— реклама —

„Започна големата акција за засадување 3.500 садници низ Скопје, со која го обновуваме зеленилото и ги раззеленуваме јавните површини. До крајот на сезоната ќе бидат засадени вкупно 6.000 нови садници!“, соопшти градоначалникот.

Според него, нови дрвја ќе се садат во сите делови на градот, со намера зелените површини да бидат подостапни за граѓаните.

— реклама —

„Во секоја општина, за секое маало, за сите скопјани!“, порача Ѓорѓиевски.

Градоначалникот нагласи дека зеленото и чисто Скопје останува еден од неговите приоритети и дека засадувањето нови дрвја е инвестиција во поздрав живот и подобра животна средина.

— реклама —

„Зад нас нека останат дрвја што ќе растат, паркови што ќе живеат и дела што ќе траат!“, наведе тој, завршувајќи ја објавата со пораката: „Скопје се сака со дела“.

Во најавата не се прецизирани точните локации на кои ќе се засадуваат сите садници, ниту роковите за реализација по општини.