Ѓорѓиевски: Почна поделбата на бесплатни униформи за сите ученици од прва година

Започна реализацијата на мерката за доделување бесплатни униформи на сите ученици од прва година во средните училишта на Град Скопје. Првата пратка пристигна во средното училиште „Раде Јовчевски – Корчагин“, информираше градоначалникот Орце Ѓорѓиевски.

— реклама —

Униформите се изработени од 100 отсто памук, а според Ѓорѓиевски, мерката има цел да го олесни семејниот буџет и да ги намали видливите социјални разлики меѓу учениците.

Тој посочи дека секој ученик треба да има еднакви услови во училишната средина, без разлика на финансиските можности на семејството, и дека облеката не смее да биде причина за потсмевање, дискриминација или врсничко насилство.

— реклама —

Градоначалникот потсети и на другите вложувања во средните училишта во Скопје, меѓу кои опремување кабинети по информатика, набавка на дидактички материјали, интерактивна технологија, паметни табли, нови клупи и столчиња, како и уредување спортски терени и фитнес-зони.

— реклама —

Ѓорѓиевски порача дека поддршката за младите останува еден од приоритетите на градската администрација, нагласувајќи дека вложувањето во учениците е вложување во иднината на Скопје.

— реклама —