Градоначалникот на Скопје, Орце Ѓорѓиевски, денеска беше домаќин на претседателката на Република Индија, Драупади Мурму, и на претседателката на Македонија, Гордана Силјановска-Давкова, на свеченото откривање на бистата на Махатма Ганди во Музејот на Град Скопје.
Ѓорѓиевски ѝ посака срдечно добредојде на претседателката Мурму, истакнувајќи дека поставувањето на бистата претставува траен потсетник на вредностите што ги застапувал Махатма Ганди – мирот, ненасилството, слободата, вистината и моралната храброст.
Тој нагласи дека настанот има посебна симболика затоа што се одржува во Скопје, родниот град на Света Мајка Тереза, посочувајќи дека и покрај различните животни мисии, Ганди и Мајка Тереза ги поврзуваат универзалните вредности на човечноста, љубовта, сочувството и грижата за другите.
Градоначалникот потсети и на солидарноста што светот му ја покажал на Скопје по катастрофалниот земјотрес во 1963 година, оценувајќи дека токму затоа градот и денес продолжува да гради мостови на пријателство, меѓусебна почит и соработка меѓу народите.
Според Ѓорѓиевски, откривањето на бистата на Махатма Ганди ќе придонесе за понатамошно зајакнување на пријателските односи меѓу Македонија и Индија и ќе отвори нови можности за соработка во областа на културата, образованието, науката и поврзувањето на двата народа.
Тој порача дека новото спомен-обележје ќе остане траен симбол на мирот, човечноста и пријателството, како вредности што ги обединуваат народите без оглед на границите.
