Во Скопје започна одбележувањето на еден век постоење на Зоолошка градина Скопје, при што градоначалникот Орце Ѓорѓиевски најави низа активности, инвестиции и модернизација со цел унапредување на условите за животните и подигнување на образовната и едукативната улога на институцијата.
Од градот истакнуваат дека оваа година има посебно значење бидејќи се одбележуваат 100 години од постоењето на Зоолошката градина, период кој е опишан како исполнет со спомени, детска радост и вредности што траат. Според најавите, јубилејот истовремено претставува и обврска за создавање подобри услови и посигурна иднина за објектот.
Во рамки на најавените активности, се планира соработка со стручни експерти и воведување нова организациска и развојна динамика, со цел враќање на Зоолошката градина во Европска асоцијација на зоолошки градини и аквариуми и подигнување на европските стандарди за грижа за животните, едукација и доверба кај посетителите.
Покрај инвестиции и модернизација, најавени се и нови содржини, со кои Зоолошката градина треба да прерасне во простор за учење, доживување и градење еколошка свест. Дел од иницијативите опфаќаат и кампањи за поддршка и грижа за животните, во кои граѓаните ќе можат директно да учествуваат.
Од градските власти порачуваат дека со овие активности се отвора нова фаза во развојот на Зоолошката градина, со визија таа да се модернизира и да го зацврсти своето значење како една од клучните јавни институции во Скопје.
