Ѓорѓиевски: Жичницата на Водно нема да работи летово, постои ризик да се откачи гондолата

Жичницата на Водно нема да биде пуштена во употреба во текот на летниот период, откако извршените проверки покажале сериозни технички оштетувања и потенцијален ризик од откачување на гондолата, изјави градоначалникот на Скопје, Орце Ѓорѓиевски.

— реклама —

Тој појасни дека иако објектот е во функција околу 15 години, досега не бил извршен целосен сервис од страна на производителот „Допелмаер“. По увидот на тим од австриската компанија, градските власти донеле одлука жичницата да остане затворена.

— реклама —

Жичницата беше затворена на 25 април, а првично од ЈСП „Скопје“, кое стопанисува со неа, било најавено дека ќе биде надвор од употреба само два дена. Сепак, по дополнителните проверки, одлучено е таа да не се пушта повторно во сообраќај.

— реклама —

Според Ѓорѓиевски, при увидот биле утврдени истрошени гумени делови, што предизвикувало триење на гондолите, како и нефункционални сензори, што претставува потенцијален безбедносен ризик.

— реклама —

ЈСП „Скопје“ во моментов очекува понуда од „Допелмаер“ за целосен сервис и проценка на трошоците, по што ќе се одлучува за понатамошните чекори.