„Главата ми беше надвор од авионот“ – прва исповед на Србинот кој преживеа хорор во летот на „Рајанер“

Речиси две недели по драматичниот инцидент на летот на „Рајанер“ од Солун до Меминген, Германија, првпат јавно проговори 61-годишниот Србин Љубиша Каровиќ, кој за малку ќе загинел откако прозорецот до неговото седиште се скршил, а декомпресијата го извлекла со половина тело надвор од авионот.

Инцидентот се случил на 10 јули на летот FR1879. Според сведоштвата, неколку минути по полетувањето се слушнал силен удар, откако дел од моторот се откинал и удрил во прозорецот покрај кој седел Каровиќ.

— реклама —

Ударот го скршил прозорецот, а поради ненадејната декомпресија патникот бил повлечен кон отворот, при што главата и рамената му останале надвор од авионот на височина од околу 20.000 стапки. Неговата сопруга и други патници успеале да го задржат и да го извлечат назад во кабината.

Во интервју за германскиот „Билд“, Каровиќ раскажува дека во моментот на несреќата спиел.

— реклама —

„Заспав. По некое време ме разбуди многу гласен шум што звучеше како експлозија на бомба. Бев свесен само еден момент и не можам да се сетам на останатото. Кога се освестив, имав крв насекаде, крв ми капеше од лицето и рацете. Штом ги затворам очите, ми доаѓаат слики од она што го доживеав во тие минути. Тоа е кошмар кој не можам да го објаснам со зборови“, изјавил тој.

Во несреќата се здобил со изгореници на десната рака и грбот, а десната страна од телото привремено му била парализирана. Делумно му биле оштетени и десното уво и десното око.

Каровиќ вели дека последиците не се само физички, туку и психолошки.

— реклама —

„Сега сè ме мачи. Ме мачи гужвата и вревата, не можам да одам по улица. Психолошки го достигнав дното. Ова има влијание и врз мојата работа и врз моето семејство. Тоа е целосно нарушување во мојот живот. Воопшто немам концентрација. Моето внимание не може да се фокусира никаде. Едноставно не функционирам правилно“, рекол тој.

Додава дека повеќе не може ниту да помисли да патува со авион.

„Дури и не помислувам да се качам на друг лет. Секој пат кога ќе слушнам авион, се вознемирувам и добивам треска. Воопшто не се чувствувам добро“, изјавил Каровиќ.

Засега не е познато дали ќе може целосно да закрепне, ниту дали ќе биде потребна дополнителна операција или долготрајна рехабилитација.