Рајанер размислува за привремено замрзнување на платите поради растот на цените на горивото

Ирската нискобуџетна авиокомпанија „Рајанер“ разгледува можност за привремено замрзнување на платите на вработените со цел да се справи со наглото зголемување на трошоците за гориво.

— реклама —

Од компанијата очекуваат цените на горивото да останат високи во текот на поголемиот дел од 2027 година, доколку конфликтот во Иран не биде брзо решен. Проценките се дека краткорочно трошоците за гориво ќе им се зголемат за две милијарди евра, а се очекува и поскапување на авионските билети во Европа.

Сепак, во „Рајанер“ сметаат дека повисоките цени на билетите нема да бидат доволни за покривање на дополнителните трошоци, поради што разгледуваат повеќе мерки, меѓу кои и привремено замрзнување на платите. Би-Би-Си побарал коментар од синдикатот „Јунајт“, кој ги застапува вработените во компанијата.

— реклама —

Во периодот од шест месеци, заклучно со крајот на септември, добивката на „Рајанер“ пред оданочување се намалила за 16 отсто, на 2,4 милијарди евра, главно поради повисоките трошоци за гориво.

— реклама —

Од компанијата наведуваат дека однапред договориле набавка на 80 отсто од потребното гориво по фиксни цени, со што се заштитиле од дел од поскапувањето. Но, цената на преостанатите 20 отсто се удвоила.

Цените на авионското гориво годинава нагло пораснаа поради војната на Блискиот Исток, која ја намали испораката на рафинирани нафтени производи од земјите во Персискиот Залив и ја зголеми конкуренцијата за гориво од другите делови на светот.

— реклама —

Извршниот директор на „Рајанер“, Мајкл О’Лири, минатиот месец изјави дека очекува компанијата и другите авиопревозници следната година да ги зголемат цените на билетите за 15 до 20 отсто.